E rangin kakawaki iroun TE NATI N ONOTOA te bong ae te Kaonobong, 30 n Aokati 2025 ba ea koro 18th ana ririki aia maneaba ae BURANIKAIN ONOTOA II man mwin tiana ni kateaki n 31 Aokati 2007 iaon Bairiki. E tei te maneaba aio ni kaitara te reirei ae te Rurubao Primary School.    

Ea kaukaki te botaki ni katekeraoi aio n te tataro iroun MK Moterate Tabotabo, te Minita man KUC Bairiki. Ea rimwiaki n taeka ni butimai nakoia irua iroun te Unimane man te Bwabwaro ae Raebwati Taange ao man ueenaki mwina n te katakobau irouia te Nati n Onotoa nakoia aia irua.  

Irua aika rine man te Tautaeka n onea mwin te Beretitenti ao te Kauoaman n Beretitenti, are a nakonako, bon te Minita ae Rine ae Hon Alexander Teabo man te MICT, ao n raonaki irouia naba raona ni Minita aika a rine aika Hon Ruateki Tekaiara man te Botaki n Reirei ao Hon Mikarite Temari te Minita ibukin te Aono n Raina ao Rawaki. 

E anga taeka ni kakaitau ibukin te Tautaeka, Hon Alexander Teabo, ibukin aia kakao te nati n Onotoa ao man kabura ieta mwin ana makuri te nati n Onota “...ao ti rangin kaonaki n te kukurei ba aio te ririki ae 18, aio are e moan katerea iai korakorana Onotoa ni katea BURANIKAIN ONOTOA II, e aki rube te mata n te kateitei ae kam karaoia aio kain Onotoa (Kateaki 21/07/07 - Tia 31/08/07)...“ E reitia riki te Minita „.....ao ngaia te ririki naba anne (2007) are e moan roko inanon te marae are Te Auti n Tei, ami man ni kaewewe te aomata are ea kaira te Tautaeka n te tai aei. E katea ribana mai ikai Onotoa. Ao tia roko inanona n te tai aei, ana Ka18 n ririki naba inanon te Auti n Tei ao are ea roko n ana ka3 n term Onotoa....“

A reiti maroro ni katekeraoi naba te tia tei man TUC ae Hon Birimaka Tekanene, TUC Mayor ae Karaebwa Tibwere, te Minita KUC Bairiki ae Noterate Tabotabo. Ao e aanga te kabanea ni maroro mai irouia irua ao te Tautaeka Hon Mikarite Temari ni kauataoi riki ana karabaraba te Tautaeka ni kaoakiia nakon te bukamaru aio ao ni kamoamoaiia kain Onotoa n reken naba aia tabo ni bobotiia. E kakaitau naba Hon Mikarite noorakia Unimane n tain te bukamaru aio,  

Irua riki are a roko ni kakoaua te bukamaru aio bon aia Taan Koroboki ao Aobitia Minita ake a tei ibukin te Tautaeka, KUC Bairiki ao tabeman riki.        

N ana maroro te Mayor ae Nei Taarena Itibwate (ibukin te Kauntira ao te Bwabwaro), iaon rongorongon moan katean te maneaba aio ao e taku ba iai $50,000.00 man ana buoka Taiwan n raonaki ma aia biribiri Te Nati n Onotoa mai Onotoa ao iaon Tarawa. E karaoaki BURANIKAIN ONOTOA II irouia kain kaawan Onotoa aika 5 ba Tekatana, Buamao, Otoae, Aiaki ao Tabuarorae. E kateaki te maneaba aio man ana tamnei te unimane ae IERITE BAIBUKE (ea tia ni motirawa) ao bon kain te kawa ae Tabuarorae.

Ea butimaeaki aia maroro irua iroun te unimwane ae Taaketi Aabera ao ni karabaia n rokoia ao riki aia maroro ni kaungaia riki te nati n Onotoa. E tabeki naba taeka ni kakaitau te unimane aio nakoia kain te Kabineti n aia boutoka nakon aia Tia tei are ea reitinako ana tai n reita tauan te nakoa ni Beretitenti ibukin Kiribati.

Norii riki kanoan te bukamaru ni kukurei n tamnei aikai.